ليه تطاطي

ليه تطاطى

لواحد عالى او واطى

ليه تكبر

ليه تعاند

مادام ع الغربه مش راضى

ايه أخدت م الغربه

غير الكربه

غير الغربه

البعد عن مصر النيل

الارض والتربه

ايه جنيت ... غير الاحزان

وفرقة الاهل والخلان

غير ليل طويل.... تقليل

عمرك ما نمته نعسان

ليه تعرف عن الاهل أخبار

من هاتف او شاشات أقمار

من سطور باردة

تزيد ... سجن الغربه أسوار

إن كان للعلم والخبرة

فأهلا بالغربه والعبرة

وان كان للنجاح ف المال

إحذر .. سم الافعى والكوبرا

ليه تتوه بين الاصل والصورة

بين كلمات جوفاء

واخرى مأثورة

مش كل ما يلمع دب

ولا كل ما يلمع

تتوه فيه العين زايغة

مبهورة

ولا كل طير فى السما

كان فى الاصل عصفورة

ليه تبوح بشكواك واسرارك

لواحد داره غير دارك

بجمع القرش محموم

ساكن جنبك ومش جارك

تخافة ..

خوف الطفل م الظلمة

واحنا اللى خدنا ع اللمة

مع اى قريب ..

ولا غريب

مع إبن العم والعمه

تعالى ...

إزرع الارض بالخير

لكل الاهل والغير

لجل تطرح حب وموده

بسرعة أهجر الغربه ياطير

وفوت ..

صداع الديسكو والزنه

دموع الفرقة والانة

دى مصر الفرح والحنه

دى مصر الشمس والحضن

دى مصر حته م الجنة